Professor Harunobu Saijo Ph.D husi Universidade Hirosima Japaun audiensia ho Prezidente Komisaun Funsaun Públika, Agostinho Letêncio de Deus hodi ko’alia kona-ba survey impaktu promosaun ba funsionáriu públiku.
Inisiativa husi peskiza ne’e Professor agradese ba disponibilidade KFP ne’ebé simu ho di’ak atu inisia perkiza ligadu ba promosaun nian ba tinan 2019-2023 ba funsionáriu sira nia motivasaun servisu, atitude no bem estar funsionáriu nian.
Professor Harunobu Saijo Ph.D husi Universidade Hirosima ne’e mós hato’o ninia prontidaun total hodi fó apoiu ba KFP hodi halo peskiza ba asuntu pertinentes hodi halo reforma administrasaun públika. Alende ne’e informa mós kona-ba estudantes timoroan nain lima ne’ebé daudaun ne’e estudu iha Universidade Hirosima Japaun halo peskiza ligadu ba avaliasaun dezempeñu.
Prezidente KFP, Agostinho Letêncio de Deus apresia ba Professor Saijo ninia prezensa ba interese peskiza ne’e, tanba relasiona ho peskiza ne’e importante hodi define mós polítika iha kontestu administrasaun públika nian no sai mós referensia ba KFP hodi define polkítika ida di’ak liu ba oin.
Iha reuniaun audiensia Professor Saijo ne’e Prezidente KFP esplika mós planu reforma IV mandatu KFP nian ba iha administrasaun públika ne’ebé mak define ona 18 komponentes inklui promosaun no kareira iha funsaun públika.
Audiensia ne’e hala’o iha loron segunda-feira, (03/02/2025) iha gabinete Prezidente KFP, Matadouro, Díli.