Dili, 8 Setembru 2026 — Profesór foun hamutuk nain 40 ne’ebé sei hala’o knaar hanorin iha Eskola CAFÉ hahú ona formasaun inisiál durante loron tolu, hahú husi 8 to’o 10 Setembru 2026 ho matéria prinsipál sira kona-ba lejislasaun, kuríkulu, pedagójika, teknolojia no komunikasaun, iha Salão Enkontru Ian Martin, Instituto Nacional de Formação de Docentes e Profissionais da Educação (INFORDEPE), Balide, Dili.
Abertura formasaun ne’e hala’o ho prezensa Ministra Edukasaun, Dulce de Jesus Soares, Presidente Comissão da Função Pública, Agostinho Leténcio de Deus, Presidente INFORDEPE, no Coordenadora Projetu Eskola CAFÉ, hamutuk ho kargu diresaun no xefia husi INFORDEPE no Ministériu Edukasaun.
Profesór foun nain 40 ne’e sei koloka iha Eskola CAFÉ iha munisípiu sira, inklui Atauro, kompostu husi Profesores área Teknolojia Multimedia nain 11, feto nain 6 no mane nain 5; Biolojia no Jeolojia nain 18, feto nain 7 no mane nain 11; Relijiaun no Moral nain 11, feto nain 9 no mane nain 2.
Iha Presidente Comissão da Função Pública Agostinho Leténcio de Deus nia diskursu hateten, formasaun ne’e obrigatoriu no la’ós deit preparasaun atu profesór sira hanorin estudante, maibé mós sai nu’udar oportunidade importante atu sira kontinua aprende no aprofunda sira-nia kapasidade, liuliu iha área ensinu no lian Portugés.
Nia mós apela ba profesór foun sira atu aproveita tempu formasaun ne’e ho di’ak no aprofunda liután koñesimentu kona-ba métodu no prosesu aprendizajen, inklui maneira atu maneja no orienta estudante sira iha sala ka aula laran.
Iha parte seluk, Ministra Edukasaun, Dulce de Jesus Soares, esplika katak nomeasaun profesór foun nain 40 ne’e iha objetivu atu substitui profesór Eskola CAFÉ sira ne’ebé liu ona teste no hetan bolsa kandidatu, no agora sira hala’o ona knaar hanorin iha eskola públika sira. Ministra Edukasaun mós subliña katak Eskola CAFÉ la’ós deit fatin atu profesór sira hanorin estudante, maibé mós fatin importante ida atu profesór sira kontinua aprende, dezenvolve koñesimentu, kapasidade no kompeténsia pedagójika, hodi bele asegura prosesu aprendizajen ne’ebé di’ak liután.