Prezidente Komisaun Funsaun Publika, Agostinho Letêncio de Deus, Ministra Edukasaun, Dulce de Jesus Soares, Sekretariu Estadu Ensinu Superior akompaña husi Prezidente Autoridade Munisípiu Manufahi, Luis Inacio Henrique Fernandes iha tersa-feira ne’e (04/06/2024) fó posse no termu aseitasaun ba profesóres hamutuk nain 312 kompostu feto nain 207 no mane nain 105 iha salaun Paroquia Same-Manufahi.
Prezidente Komisaun Funsaun Públika, Agostinho Letêncio de Deus lori KFP nia naran agradese ba Ministra Edukasaun no Sekretáriu Estadu Ensinu Superior ne’ebé ho desizaun tomak posse ba profesores, ne’ebé konsidera la fasil no nakonu ho dezafiu hodi konverte profesores sira husi estatutu kontratadu hahú 2013 konsege ba iha ingresu ba prosesu permanente. Tanba ne’e husu ba parte hotu liuliu profesores sira atu kontinua mellora servisu edukasaun nian hodi hanorin alunus sira, asegura rekursu umanus ne’ebé ho kualidade.
Prezidente KFP hateten, Politika ingresu hola parte iha IX Governu hodi hahú elabora prosesu edukasaun nian. Tanba ne’e KFP sei kontinua fó apoiu maximu ba desizaun hot-hotu ba Ministeriu Edukasaun nian iha vida funsionariu públiku nian.
Komisaun husu ba profesore sira atu sai ezemplu iha komunidade hodi hanoirn alunus sira, tenki servisu ho lealdade, disiplina, pontualidade no responsabilidade, servisu sem haree ba kores hodi asegura kualidade funsionariu iha futuru oin mai. Komisaun Funsaun Públika ezije mós ba profesores sira atu servisu ho profesionalizmu atu labele ezije uluk direitu maibé, tenki hala’o uluk dever tuir títulu profesores sira nian katak, profesores tenki sai ezemplu ba iha sosiadade tanba kualidade profesores importante atu eduka no transforma alunus sira sai matenek.
Molok remata Prezidente KFP promete sei halo vizita mós ba eskola sira hodi halo observasaun direta ba prosesu aprendizajen iha eskola ida-idak.
Entretantu Ministra Edukasaun, Dulce de Jesus Soares iha diskursu hateten, importánsia husi knaar profesóres mak profesóres nudar sientista tanba, avalia alunu sira nia progresu no kria, proteze hodi koko métodu ne’ebé sei ajuda atu lori alunus ida-idak atinji sira nia potensial tomak, profesóres maka konselleiru fó kuidadu ba alunus sira durante tempu di’ak no susar, profesóres fó motivasaun, enkoraja estudante sira atu aprende husi sala no fó vontade ba alunus sira. Profesóres mós hanesan espesialista iha área ida-idak nian, istoriador no linguístika hodi fahe sira nia matenek ho laran luak ba jerasaun tuir mai.
Ministra Edukasaun mós konkorda katak, vokasaun profesóres importante iha sosiadade, iha nasaun, iha mundu tanba edukador maka sistema edukasaun nia fuan.
Tuir Ministra Edukasaun katak, manorin ne’ebé di’ak ba alunu sira iha nia turma liu fali padraun kurikular.
Ikus liu Ministra Edukasaun, Dulce de Jesus Soares husu mós ba Prezidente Autoridade atu ajuda Ministeriu Edukasaun ho aktividade vizita ba eskola sira iha Munisípiu hodi ko’alia ho profesóres, asosiasaun inan aman no profesóres hodi buka hatene kada problema ne’ebé hasoru no oinsá atu buka solusaun. Halo kooperasaun servisu entidade sira nia ho Ministeriu Edukasaun importante atu garante no mellora kualidade edukasaun ida di’ak ba Timor-Leste.
Partisipa iha S’serimónia posse no termu aseitasaun ba profesóres Ingresu Espesial no Rejime Dosentes mak autoridade sivil no militar, familia emposadu, no estudantes Ensinu Sekundariu Tekniku Vokasional Akadiru Hun Same ne’ebé simu konvidadus sira ho grupu banda, dansa tradisionál no mós poezia.
Iha oportunidade ne’e entrega mós ekipamentus elektronika doasaun husi UNICEF kompostu Leptop Unidade 1, Tablet unidade 4, printer unidade 1 no seluk tan ba sentru Komunitariu Dame Same, Manufahi.
