Tersa-Feira, 14/05/2024 – Prosesu teste eletrónika bolsa kandidatus rejime dosentes ne’ebé hala’o hahú loron 15 Marsu remata 16 Abríl tinan 2024 prosesu ida kualidade, transparansia iha istória edukasaun nian, tanba depois teste kandidatu ida-idak bele haree rasik ho matan valor teste ne’ebé kandidatu sira rasik konkista.
Liafuan ne’e presta husi Prezidente Komisaun Funsaun Públika, Agostinho Letêncio de Deus iha diskursu serimónia tomada de posse no termu aseitasaun ba profesores rekrutadus nain 491 iha salaun enkontru INFORDEPE Balide, Díli.
Agostinho Letêncio de Deus esplika, maske iha inisiu teste mosu krítiku oioin husi públiku ba Ministériu Edukasaun no Komisaun Funsaun Públika será que bele asegura transparante ne’e ga lae. Maibé rezultadu teste eletrónika profesores nain atus lima resin ne’ebé pasa, husi total kandidatus nain rihun 13.021 ne’ebé kompete hatudu ona kualidade no transparante. Iha prosesu administrasaun públika termu posse prosesu importante ba funsionáriu públiku iha área edukasaun ne’ebé emposadu sira jura ba Maromak, Rai Lulik, Estadu no Povu hodi kompromete atu servisu hodi hanorin alunus sira ho responsabilidade no sai matenek ba futuru Timor-Leste nia ho di’ak. Prosesu teste bolsa kandidatu hatudu koordenasaun servisu ne’ebé di’ak entre KFP ho Ministériu Edukasaun hodi minimiza nepoztimu, tanba teste remata kandidatu sira haree kedas nia rezultadu. Tanba ne’e sei kontinua dezenvolve sistema ida ne’e atu garante katak, edukasaun nia kualidade ne’ebé di’ak tenki hahú kedas kualidade profesores sira nia ne’ebé refleta IX Governu nia polítika reforma digitalizasaun no garante kualidade administrasaun iha futuru oin mai.
Molok remata Autoridade KFP ne’e husu ba emposadu sira ne’ebé simu posse atu ba servisu ho responsabilidade, kualidade ho natureza serví hodi hanorin alunus sira no parte Komisaun Funsaun Públika sei kontinua halo monitorizasaun kona-ba resposabilidade, disiplina servisu, loyalidade, étika moral iha ida-idak nia servsu fatin. Lori KFP nia naran agradese ba parte hotu nia apoiu liu-liu ekipa téknika husi Ministériu Edukasaun no KFP susesu teste eletronika ba profesores refleta kontribuisaun ba programa polítika reforma IX Governu sei hala’o.
Entretantu, Ministru Interinu Edukasaun Sekretariu Estadu Ensinu Sekundáriu no Eskola Téknikas, Domingos Lopes Lemos hateten, prosesu teste eletróniku ne’ebé halo ho kualidade, asegura kualidade profsores atu hanorin alunus sira iha ambitu digitalizasaun inklui profesores kontratdu tinan 2023 nain 40 resin ne’ebé pasa iha teste, hodi responde ezijensia públiku kona-ba intervensaun polítika ba prosesu teste. Profesores nain 489 ne’ebé simu posse baxarelatu sei asina deklarasaun atu koloka iha munisípiu sira tuir nesesidade eskola, husu atu sai ezemplu hodi hadomi profisaun, asegura kualidade ensinu iha ida-idak nia eskola.
Enkuantu tuir relatóriu husi Diretora Rekursu Umanus Ministerio Edukasaun, Anita Tavares katak, profesores ne’ebé pasa iha teste eletrónika bolsa kandidatu rejime dosentes 568 resin maibé, nain 491 maka kompleta dokumentus hodi simu posse no termu aseitasaun, enkuantu restu la kompleta dokumentus no balun resigna aan. No atualiza mós informasaun kona-ba teste bolsa kandidatu ba Segundu faze sei hala’o tempu tuir mai maibé, mensiona data fisku tanba sei iha prosesu diskusaun.
Partisipa iha serimónia tomada de posse no termu aseitasaun ne’e mak Prezidente INFORDEPE, kargu deiresaun xefia husi liñass ministeriais, reprelijiosa, diretor edukasaun, Inspetores eskolares husi Munisípius, emposadus no familia.
