Ministériu Edukasaun servisu hamutuk ho Komisaun Funsaun Públika hala’o serimónia termu aseitasaun no posse dala ikus nian ba professor Ingresu Espesial husi rejime kareira dosente nain 491 kompostu feto nain 240 no mane nain 251 iha Munisípiu Bobonaro iha kinta-feira, (15/8/2024).
Prezidente KFP, Agostinho Letencio de Deus iha diskursu hateten, servisu hamutuk entre KFP ho Ministeriu Edukasaun oinsá solusiona situasaun profsores sira kontratadu iha tinan 2013 toó tinan 2022 sai funsionariu permanente, ne’ebé probatoriu tinan rua maibé, kontinua ejize dedikasaun profesóres sira nian.
Prezidente KFP introduz mós katak, sistema digitalizasaun atu fasilita funsionariu sira inklui profesóres sira bainhira mosu problema dokumentus, identidade pesoal, saláriu funsionariu sira nia la presiza la’o too Ministeriu Edukasaun no KFP, maibé bele liu husi meius komunikasaun.
Prezidente dehan, parte KFP sei kontinua dezenvolve sistema digitalizasaun ne’e hodi bele aplika mós ba lista prezensa hodi asegura servisu disiplina funsionariu sira nian liga ba preokupasaun profesores kona-ba pagamentu. Pagamentu sei bazeia ba despaixu no direitu sei la lakon, tanba neé husu ba profesór atu dedika aan ba servisu hodi hanorin alunus sira.
Autoridade Funsaun Públika ne’e husu profesóres atu kaer metin ba juramentu ne’ebé halo iha serimónia posse ne’e hodi kesi profesores sira nia lealdade ba konstitusaun no leal ba servisu. No husu atu haree ba prátika di’ak sira hudi rskoma kolejiu Maliana nian iha tempu Português ne’ebé produz ema lubun ida ho kualidade ne’ebé sai líder di’ak ba nasaun Timor-Leste.
No ho esperansa boot ba profesóres nain 491 iha Munisipiu Bobonaro kontinua banati tuir hodi produz lideransa Timor oan sira seluk iha tinan 10 oin mai sai lideransa, jerasaun patriota no eroi foun ba Timor-Leste.
Entretantu Ministra Edukasaun, Dulce de Jesus Soares hateten, durante ne’e Ministeriu Edukasaun halo alokasaun orsamentu boot ba formasaun materia kada tinan, maibé públiku kontinua preokupa kona-ba kualidade edukasaun, alunus sira lahatene le’e no hakerek, kazu profesores abandona alunus, profesores la pontual tama servisu. Tanba ne’e IX Governu Konstitusional liu husi Ministeriu Edukasaun tau prioridade ba kualidade edukasaun liu husi ingresu espesial husi rejime kareira dosente no bolsa kandidatu ne’ebé prosesu hotu la’o ona.
Ministra Edukasaun ne’e husu, nu’udar profesores kaer metin kompetensia haat ne’ebé hanesan matadalan, tenki iha etika professional, domina lingua, domina pedagozia-metodologia, no tenki domina mós informasaun komunikasaun no teknolojia. Tuir ba lei baze edukasaun nian atu forma ema hodi atinji potensia, la’ós de’it haree husi valor, maibé oinsá moris nu’udar estudantes no sidadaun ida moris iha komunidade nia leet. Atu atinji ba sistema edukasaun ida ne’ebé ho kualidade presiza apoiu servisu husi parte hotu, servisu hamutuk hodi tau matan ba hasa’e kualidade edukasaun iha Timor Leste.
Total profesores hamutuk nain rihun 4.089 iha territóriu Timor Leste maka Ministeriu Edukasaun no Komisaun Funsaun Públika fó ona posse no termu aseitasaun ba ingresu espesial rejime kareira dosente ne’ebé koloka ona ba iha eskola sira atu hanorin alunus sira iha teritoriu Timor Leste.
Partisipa iha serimónia ne’e Prezidente Komisaun F, Prezidente Komisaun C Parlamentu Nasional, Sekretáriu Estadu Ensinu Sekundariu Tekniku Vokasional, Prezidente Autoridade Munisipiu Bobonaro ho nia estrutura, Prezidente INFORDEPE, Komisarius KFP ho ekipa Sekretaridu KFP, Komandante Polisia no família emposadu.
