Profisionais Seniores Nain 9 Simu Posse Husi KFP

Díli 20 Setembru 2022, Komisaun Funsaun Públika realiza posse no asinatura termu aseitasaun ba profisionais seniores nain 9, iha salaun Ministériu Saúde, Palácio das Cinzas-Caicoli, Díli.

Objetivu husi dekretu lei ne’e mak hamosu instrumentu hodi atrai no retein kuadrus profisionais ho kualifikadu di’ak ho esperensia às, liu-liu ba sira ne’ebé mak ezerse ona kargus diresaun durante tinan barak maibé, oituan de’it mak instituisaun aproveita.

Rejime ida ne’e ho intensaun atu akumula sira hodi kontinua kontribui no bele responde ba situasaun servisu iha Administrasaun Públika ho sira nia abilidade, koñesimentu, esperénsia sira ne’ebé mak iha no objetivu seluk mak atu hamenus dependensia ba asesores internasionais.

Bazeia ba desizaun husi Komisaun Funsaun Públika núm. 5066/2022/PKFP no Dekretu Lei núm.22/2017, 24 Maiu kona-ba rejime profisionais seniores iha Administrasaun Públika hodi hetan omologasaun final.

Iha diskursu komisária KFP, portfóliu Rekrutamentu, Seleksaun no Promosaun Kareira iha Funsaun Públika, Carmeneza dos Santos Monteiro reprezenta Prezidente KFP hateten, ita hamutuk iha ne’e atu selebra progresu, susesu funsionamentu públiku liu husi serimónia tomada de posse ba senior profisional, liu-liu fó valorizasaun matenek, esperensia, kapabilidade funsionáriu públiku no asegura Estadu hodi nafatin foti vantajen husi rekursu sira hodi kontribui ba pensamentu polítiku públiku no asaun sira iha prestasaun servisu iha Timor-Leste.

Ita hatudu tan susesu ida ba rekrutamentu liu husi seleksaun ba méritu ba Senior profisional sira, ba vaga sira ne’ebé sira aplika ba. Nune’e aprende mós husi emposadu sira balun ninia susesu iha kareira sira ne’ebé hahú husi grau kiik too grau aas liu iha administrasaun públika no susesu ida mak juri sira konsege hala’o prosesu sira ho rigorozu, diligente hodi konklui prosesu ne’e.

Komisária KFP fiar katak, área sira ne’ebé mak emposadu sira simu no haknar an ba, tanba área ne’ebé asume importante tebes ba progresu Timor-Leste nu’udar nasaun ida.

Tanba ne’e KFP no povu Timor-Leste tau fiar no konfiansa tomak atu hala’o kna’r hodi realiza mehi ne’ebé iha liu husi PEDN, hodi nune’e povu hotu haree liu husi progresu área sira ne’ebé mak iha no hodi hala’o knár ho loloos ba instituisaun ne’ebé mak haknar an ba.

Lori KFP nia naran felisita, kongratula emposadu nain 9 ne’ebé mak simu posse, susesu ne’ebé mak iha ba instituisaun ne’ebé haknar an ba ba susesu povu, nasaun Timork-Leste nian.

Husi total Seniores Profisionais nain 9 ne’e mak hanesan Carmen Joela Pereira iha área espesialidade Koordenasaun ba asuntus parlamentares ho kategoria grau A, Hernani Viterbo da Costa Soares iha área espesialidade Jestaun Rekursus Umanus grau A, Filomeno Marcelino Belo iha área espesialidade Konsultor Negósius grau A, Zenoveva Xavier Correia iha área espesialidade Jestaun Terras no Propriedades grau A, Ana Maria Pereira Carvalho iha área espesialidade Jestaun Aprovizionamentu grau A, Mário Godinho iha área espesialidade Jestaun Estratéjika ba Florestas Komunistárias grau A, Júlio da Cruz iha área espesialidade Jestaun Estratéjika ba Peskas no Agrikultura grau A, Salustiano dos Santos Carvalho iha área espesialidade Makroekonomia no Instituisoens Ekonómikas Internasionais grau A no António da Silva iha área espesialidade Integrasaun Ekonómika no Dezenvolvimentu Komersial.

Painel juri hamutuk sira mai husi instituisaun MKAE, IADE, KFP, Ministériu Justisa, MAPKOMS, MPO, MAP no reprezentante PROSIVU (Parseria ho Prosperidade Inklusivu)/ Parthership for nclusive Prosperity) husi Governu Australia nia programa, mak avalia ba dokumentu hodi passa ba prosesu vaga ba kareira profisionais seniores.

Partisipa iha serimónia ne’e Sekretáriu Estadu Komunikasaun Sosial, Sekretáriu Estadu Terras e Propriedade, reprezentante husi MKAE, MPO no família emposadu sira hotu.

Iha serimónia ne’e aprezenta relatóriu husi Prezidente juri, Nelson Philomeno no final husi atividade ne’e mós entrega sertifikadu apresiasaun ba painel juri seniores profisionais.

Tagged