PROSESU REKRUTAMENTU BA FUNSIONÁRIU FOUN NAIN 11  IADE KONPETETIVU

POSE

Institutu Apoiu Dezenvolvimentu Emprezarial (IADE) tinan 2022 rekruta tan funsionáriu foun nain 11 kompostu husi feto nain 7 no mane  nain 4, ne’ebé  sei koloka iha Sentru Emprezarial IADE iha Munisípiu Baucau, Aileu, Dili, Maliana, Ermera Díli inklui postu administrativu Maubisse Munisípiu Ainaro simu pose husi Ministru Koordenador ba Asuntus Ekonómikus, Joaquim Amaral, Prezidente Komisaun Funsaun Públika iha tersa feira, 29/03/2022 iha salaun enkontru IADE Mandarin, Díli.  

Ministru Koordenador ba Asuntus Ekonómikus, Joaquim Amaral hateten, ho eventu tomada de posse ba funsionáriu foun IADE nain 11 engressa tan iha kuadru Funsaun Públika liu husi prosesu rekrutamentu ida kompetitivu tebes no iha duni méritu no kualidade. Fusionáriu foun nain 11  sai mós família boot IADE,  tanba ne’e husu atu hatudu kualidade iha jornada tomak hodi kontribui ba programa IADE nian hodi forma ema liu husi formasaun no kapasitasaun ba emprezariu ida kualidade atu sai parseria ho Governu hodi kontribui ba prosesu dezenvolvimentu nasional liliu dezenvolvimentu ekonomia iha Timor-Leste.

Ministru Koordenador ba Asuntus Ekonómikus, Joaquim Amaral argumenta, Timor-Leste nasaun foun, Governu liu husi IADE presiza kria ambiente ida di’ak ba  sidadaun sira hodi halo nia atividade negósiu maibé, tenki ho inisiativa ne’ebé barak hodi hare ba potensliadade ne’ebé maka Timor-Leste iha, atu esplora hodi bele kontribui ba prosesu dezenvolvimentu nasional.

Nune’e nia husu mós ba funsionáriu foun sira atu kompriende ho di’ak misaun vizaun no papel IADE nian hodi kompleta kuadru pesoál iha sentru emprezarial sira iha munisípiu, sai agentes importante ida hodi atende sidadaun sira ne’ebé iha inisitiva di’ak atu hahú sira nia negósiu. Tanba ne’e nu’udar funsionáriu públiku labele baruk atu aprende hodi atualiza nafatin koñesimentu hodi eleva no mellora atendimentu ida ho kualidade responsabilidade no integridade.

Sorin seluk, Prezidente Komisaun Funsaun Públika, Faustino Cardoso Gomes ne’eb’e partisipa m’os iha serimonia tomada de posse hateten,  funsionáriu foun IADE nain 11 ne’ebé maioria feto, nain 7 hatudu duni komprimisu no avansu boot ida iha âmbitu oinsá atu promove liu tan partisipasaun feto iha servisu públiku hodi asegura liu tan integridade Funsaun Públika iha prosesu atendimentu.  Prezidente KFP ne’e  afirma, prosesu rekrutamentu ba funsionáriu IADE nain 11 kompetetivu tebes tanba aplikantes nain 370 liu husi selesaun dokumentus ema nain 123 konsege pasa ba etapa teste prova eskrita no rezultadu teste ema nain 11 maka hetan valor as hodi priense vaga ne’ebé IADE planeia.

Tuir Faustino Cardoso, prosesu rekrutamentu, kompetetivu, integridade, transparansia hodi asegura di’ak liu tan valores prinsipiu boa Governasaun hodi hadook husi tentasaun familiarizmu, KKN, no mós politizasaun atu konsolida sistema no prinsipiu méritokrasia.

Molok remata Prezidente KFP Faustino cardoso Gomes lori KFP nian naran enkoraza nafatin atu mantein nafatin ekipa servisu hamutuk IADE no KFP iha prosesu rekrutamentu iha futuru no husu mós  funsionáriu foun nain 11  atu kontinua kaer metin prinsipiu servisu ekipa ne’ebé sai xave ba konkistasaun susesu  hodi serví povu no nasaun  Timor-Leste.