Kargu Diresaun no Xefia sesante importante ba kargu Diresaun no Xefia foun, atu servisu hamutuk iha âmbitu jestaun rekursu humanu, hodi halo reflesaun ba responsabilidade no esperensia tempu kotuk nian, atu iha kompetensia no Matenek hodi hakat ba kna’ar no responsabilidade foun, liu husi komunikasaun, koordenasaun servisu, iha kontestu servi Estadu.
Prezidente Komisaun Funsaun Públika Faustino Cardoso Gomes ko’alia liafuan hirak ne’e, wainhira partisipa iha enkontru tranzisaun kargu Diresaun no Xefia iha Ministériu Agrikulutura Pekuaria, Peska no Floresta-MAPPF iha salaun enkontru Ministériu nian iha segunda feira loron 4 fulan setembru tinan 2023.
Prosesu transizaun responsabilidade husi kargu Diresaun no Xefia tuan ba kargu Diresaun Xefia foun, hahú husi Diretor Geral, Diretor Nasional, Xefe Deprtamentu, no Xefi seksaun sira hamutuk ema na’in 154, kompostu husi ema na’in 102 okupa kargu Diresaun Xefia no 52 okupa kargu estensaun, bazeia ba proposta nomeasaun husi Ministériu MAPPF ba Komisaun Funsaun Públika hodi prienxe estrutura Ministériu nian iha Nivel Nasional no eskola teknika vokasional Agrikula nian.
Prezidente KFP Fasutino Cardoso Gomes esplika katak, durante ne’e Ministru ho Sekretariu Estadu sira pro aktiva hodi halo koordenasaun servisu ho Komisaun Funsaun Públika, halo diskusaun ho natureza konsultativu, atu oinsá konsolida estrutura hodi apoiu ba implementasaun programa Ministériu iha Nonu Governu Konstitusional nian, no presensa Komisaun sai testamuña ba proseu tranzisaun refere, iha âmbitu servisu hamutuk hodi bele fó susesu ba implementasaun politika Nonu Governu Konstitusional nian hodi hasa’e produsaun rai laran no bele reduz importansaun husi estranjeiros.
Autoridade KFP Faustino Cardoso Gomes subliña liu tan katak kargu Diresaun no Xefia la’ós direitu, maibé kestaun konfiansa ne’ebé determinadu ho tempu balu nia laran, tanba MAPPF durante ne’e seidauk halo prosesu selesaun pur meritu ne’ebé nu’udar ejijensia legal ida, tanba ne’e husu nafatin ba Diretor Geral foun ho nia estrutura atu iha komunikasaun beibeik ho KFP hodi atualiza situasaun pesoal funsiunariu sira nian ba iha progresaun karreira funsionariu ida-idak nia dezenpeñu.
Prezidente sujere mós atu prosesu tranzisaun responsabilidade ne’e labele to’o de’it iha nivél Diretor Geral maibé presiza to’o iha nivel baze ho saudavél, transparensia, responsabilidade, hodi asegura ba ingetridade no mós ba desenvolvimentu karreira funsionariu sira nian.
Relasiona ho kargu xefia balu ne’ebé rekuza la prontu assume kargu, prezidente KFP hateten ne’e kabe ba dezisaun pesoal no kompetensia Ministru no Sekretariu Estadu nian atu foti desizaun.
Enkuantu kona-ba promosaun ba rejime espesial, Prezidente KFP enkoraza Ministru MAPPF atu kontinua ho prosesu promosaun ba funsionáriu permanente sira, atu bele iha desenvolvimentu karreira ba funsiunariu sira hodi asegura rekursu humanu ne’ebé adekuadu kualifikadus.
Prosesu tranzisaun ne’ebé ministeriu MAPPF hala’o nu’udar inisiu no importante atu funsionáriu sira toma responsabilidade ba servisu lor-loron, bazeia ba diskrisaun servisu hodi asegura administrasaun ida efisiensia no efikasia.
Entretantu, Ministru MAPPF Marcos da Cruz lori ministériu nian naran agradese ba Prezidente KFP, tanba bele ajuda hodi kompriede kondisaun no situasaun Ministériu nian no ikus mai konsege realiza prosesu tranzisaun resposbailidade kargu Diresaun Xefia nian ne’e la’o ho di’ak.
Ministru MAPPF Marcos da Cruz subliña liu tan katak kargu la’ós direitu maibé resposnabilidade atu fó konfiansa ba ema ida hare’e ba nia kapasidade matenek no esperensia, tanba MAPPF nu’udar Ministériu tekniku ne’ebé servisu besik liu ba populasaun tenki iha ekipa ne’ebé forte hodi fo apoiu ba programa Ministériu nian ho nia objetivu atu hasa’e produsaun agrikula rai laran hodi reduz importasaun husi estranjeiru sira, tanba realidade foos barak ne’ebé agora fa’an iha loja hakerek ho lian tetum maibé foos hirak ne’e produz no importa liu husi rai liur.
Governate sira ne’e mós agradese ba kargu xefia sesantes sira, ne’ebé kontribui ona ba dezenvolvimentu setór agrikultura durante ne’e, no husu atu kotinua fó apoiu estrutura foun ba desenvolvmentu setór grikultura, atu hodi atinje objetivu Ministériu nian, hodi hasa’e produsaun hodi bele reduz importasaun husi rai liur mai Timor Leste, liu husi eleva grupu Agrikultor, kria kondisaun infra-estutura, hodi bele kontribui ba hasa’e produsaun iha rai laran.
Ikus liu Governante ne’e husu ba Kargu Diresaun Xefia foun, atu servisu kontrolu maximu ba funsionáriu iha Diresaun ida-idak, atu halo servisu ho dixiplina, responsabilidade, hodi kontribui ba setór Agrikula. Ligadu ba estrutura MAPPF ne’ebé konsidera bo’ot, Ministru Marcos da Cruz esplika katak, MAPPF nu’udar Ministériu tekniku no estrutura mós tuir natureza Ministériu nian, atu bele halo servisu atu atinje objetivu ne’ebé atrasa ona, ligadu ba politika hasa’e produsaun hodi reduz importasaun foos husi ra liur.