Segunda Feira loron 26 fulan juñu tinan 2023, Presidente Komisaun Funsaun Publika Faustino Cardoso Gomes no Komisaria Portofolio Financas, Base de Dadus, Pensaun, Reforma, protokolu no Komunikasaun sosial Maria de Jesus Sarmento hala’o enkontru ho Diretur SEFOPE Paul Alves ho nia Ekipa hodi koalia kona ba Prosesu rekrutamentu trabalhador Timor oan, ne’ebe SEFOPE hala’o hela atu hodi responde ba Australia ne’ebe Persisa ema servisu na’in rihun 8 atu servisu.
Iha enkontru ne’ebe halao iha salaun KFP ne’e, Diretur SEFOPE Paulo Alves Informa ba Presidente Komisaun Funsaun Publika katak, total aplikante ne’ebe mak aplika ba Vagas ne’e hamutuk ema rihun 55, inklui funsionariu barak envolve iha prosesu ida ne’e, hodi taka fali opotunidade ba joven sira, liu liu empede papel SEFOPE nian programa fo oportunidade ba Timor oan atu servisu hodi redus taxa desempregu ne’ebe mak as iha Timor Leste.
SEFOPE Informa ba Presidente KFP katak Funsionariu sira ne’ebe hola parte iha prosesu ne’e, SEFOPE labele hapara, tamba laiha lei ne’ebe bandu funsionariu atu partisipa iha rekrutamentu ne’e, no Konstiusaun rasik artigu 50 mos hateten katak sidadaun Timor oan feto ka Mane iha direitu atu hetan servisu tuir nia profisaun. Durante prosese hatudu katak funsiunariu sira iha koinesementu ne’ebe diak liu, halo entrevistador sira deside sira maka pasa, hodi taka dalan ba jovem sira ne’ebe la iha servisu.
Ligadu ho prosesu rekrutamentu hanesan ne’e, tuir Asesor Legal Komisaun Funsaun Publika nian Jose Reali katak, tama ba rekezitus iskrisaun, presiza defini atu Funsionariu Publiku no kontratadu, atu labele aplika. Bainhira iha lista inskrisaun, komisaun halo verifikasaun, karik nia Funsionariu publiku ka kontratadu ou ajente administrasaun publika ruma ka kontratu kazuais sira iha, sugestaun atu kandidata labele ema ne’ebe funsionariu publiku ou ajentes administrasaun publika ou kontratadu kazuais husi sektor publiku ou ema ne’ebe servisu ona iha istituisaun estadu, maibe fo liu tempu ba joven sira ne’ebe la iha servisu. Iha fatin hanesan Presidente KFP mos hato’o ba SEFOPE katak, komisaun mos durante ne’e tenta atu akompaña SEFOPE nia prosesu rekrutamentu, ligadu ba kestaun igualidade de tratamentu, kestaun de publisidade, kestaun de objetividade kriterius, la hare ba kor politiku ka KKN, ne’e importante kriteriu sira ne’e tenke beninfisiadu objectivamente publika, para ema hotu hatene, laos tama tiha kampu mak foin muda tun sae kriteria ne’e, dehan presidente komisaun Funsaun Publika Faustino Cardoso Gomes.