Iha loron 21 fulan Junhu tinan 2023, Komisariu Disiplinar Fausto da Silva Freitas, reprezenta Presidente Komisaun Funsaun Públika-KFP ho nia ekipa marka prezensa iha serimonia Funeral Dona Isabel da Costa Fereira iha Santa Cruz Bekuse Dili. Prosesu Funeral hahu sai husi Rezidensia Meti-Aut ba Igreja Balide hodi hala’o Missa requiem, ne’ebe dirige husi Dom Virgilio Cardeal do Carmo da Silva SDB.
Iha homilia Dom Virgilio Cardeal do Carmo da Silva SDB hato’o sentidu kondolensia profunda ba nai Primeiru Ministru Taur Matan Ruak ho nia Oan no familia tomak, ne’ebe ohin loron laran susar tamba lakon kaben, inan doben no belun diak ida, tamba haketak ita isin Ema moris nian ho Ema mate ne’e nian. Situasaun ne’e maka sente iha nakukun laran tamba hanoin hetan ema ne’e nia hahalok, mak Sta Monica ho Agustino ninia mama wainhira atu mate husik hela nia lian fuan ba nia Oan Agustino dehan, hau mate liu loron rua, buka hakoi tiha iha fatin ne’ebe o hanoin dignu, maibe hau lakohi halo todan fali ba o, favor boot ida hau husu ba o mak ida ne’e deit, iha ne’ebe deit mak hau ba, no iha ne’ebe deit mak o ba, keta haluha hau. Buat ne’ebe importante liu mak halo sakrifisiu no orasaun ba Maromak.
Nudar Ema sente lakon tebes, maibe parte seluk tenke agradese ba Nai Maromak, ba moris ne’ebe haraik mai ita liu husi Dona Isabel da Costa Fereira, ba diak hotu no nia laran diak, Isabel Fereira koko ida ne’ebe matenek duni, halo moris Timor Oan nia hakarak, halo nia sei moris hanesan buat nebe hakerek iha Livru sabedoria, Ema diak sira mak iha Nai Maromak nia futar oin. Ita harohan iha Eukaristia ida ne’e, atu Na’in Feto bele simu nia, akompanha nia, bele lori ba entrega ba Nia Oan Jesus, ita nia maluk doben Isabel da Costa Fereira, atu mate ona loron ida nia sei moris fali ho Kristu.
Iha opurtunidade ne’e mos Reprezentante Santidade Amu Papa Francisco hato’o menssagem ba familia enlutada, senhor Taur Matan Ruak Primeiro Ministro Republika Democratica de Timor Leste. Sua Santidade Amu Papa Francisco informadu konaba senhora Isabel da Costa Pereira ninia mate.
Iha Missa requem ne’e Ex Reitor UNTL Sr. Aurelio Guterres lé Biografia Dona Isabel da Costa Fereira, hahu hanesan espoza Primeiro Ministro atual, ne’ebe uluk asume knar nudar Prezidente da Republika Sr Taur Matan Ruak, Ex Primeira Dama Timor Leste hahu husi 15 de Maiu Tinan 2012 to’o 15 de Maiu 2017. Saudoza Isabel da Costa Fereira Moris iha Same Munisipiu Manufahi iha loron 15 Fulan Abril tinan 1974. Dona Isabel hamutuk ho nia maun alin sira hamutuk nain sanulu resin tolu. Aman naran Mateus Fereira ho inan maka Ana Flora de Jesus.
Hahu Eskola iha Primaria iha Tinan 1980 no remata Liceu iha Tinan 1993. IhaTinan 1998 remata Licenciatura iha Universidade Nasional Dempasar Bali Indonesia area Direitu. Hahu kareira Professional iha Direitus Humanu nian no akuza Ema ne’ebe halo violentu iha tempu okupasaun Militar Indonesia iha 1998-1999. Asume knar Koordenadora Geral ba ONG kontras Timor-Timur no Diretora Direitus Humanus Timor Lorosae CGHTL iha tinan 1999 to’o 2003. Tinan 2001 Eleitu ba membru konstituite husi Lista Partidu UDT. Hakerek artigu sira iha konstituisaun RDTL nian, iha Administrasaun Trasitoria Nasoens Unidas nian. Hafoin Restaurasaun independensia, Dona Isabel Fereira assume Responsavel oi-oin, Direitus Humanus no Politikus nian, espesial hanesan vice Prezidente Cruz Vermelha Timor Leste nian iha tinan 2002 too 2007, Vise Ministra Justisa iha Tinan 2006, Membru ba Komisaun Verdade no Amizade iha 2005 to’o 2008 no Isabel Fereira hetan Resposabilidade oi-oin husi Estadu RDTL. Hafoin Missa Requiem iha igreja Balide, lori mate isin Dona Isabel da Costa Fereira nian ba halot iha Santa Cruz Bekuse Dili. Iha cerimonia Funeral ne’e partisipasaun maximu husi Lider Nasaun nian hanesan Prezidente da Republika Jose Ramos Horta, Ex Prezidente da Republika Dr Francisco Guterres Ex Primeiru Ministro RDTL Dr Mari Alkatiri no Prezidente Parlamentu Nasional Aniceto Guterres Lopes no Prezidente Tribunal Rekusu Dr Deolindo dos Santos inklui diplomatas Nasaun amigos iha Timor Leste.