Mandatu Komisaun Funsaun Públika Datoluk ne’ebé lidera husi Prof. DR.Dr. Faustino Cardoso Gomes Msi no eis komisária nain rua entrega relatóriu mandatu datoluk KFP ba Prezidente no Komisárius foun ne’ebé realiza horseik, (22/11/2023) iha KFP, Matadouro, Díli.
Sekretária Ezekutiva Maria da Costa Oliveira agradese ba lideransa III Mandatu ne’ebé husi ne’e aprende barak no sai ezemplar hodi hamosu progresu oioin iha administrasaun públika.
“Hato’o profunda gratidaun rekoñesimentu ba Prezidente KFP ne’ebé lidera KFP durante 8 resin ne’ebé mak dedika nia aan la iha kolen ba iha públiku ba Funsaun Públika ida efisiente, efikaz no transparente, mezmu foin asume kargu nu’udar Sekretária Ezekutiva ba tinan rua, ami hamutuk ho funsionáriu sira sai testamuña ba Prezidente no Komisárius sira ne’ebé mak sai ezemplar tebes ho misaun ida ba jere Administrasaun Públika ne’ebé mak dezenvolvidu ba futuru ida di’ak,”
hateten, Sekretária Ezekutiva SKFP, Maria da Costa Oliveira iha serimónia termu entrega relatóriu durante mandatu datoluk nian.
Dezafius oioin ne’ebé iha, komisárius ida-idak ho ninia maneira oinsá buka atu hatudu nafatin ho maneira ida exelente, reziliensia ba servisu sira ne’ebé iha, no espesialmente ba nasaun ne’ebé ita serbí, dehan Sekretária Ezekutiva.
Iha momentu ne’e Sekretária Ezekutiva husu nafatin iha servisu hamutuk ho efikaz, efisiente, integru no responsavél, hamutuk ita enfrenta tan dezafiu sira kapítulu foun KFP iha tempu oin mai, hamutuk ho Prezidente no Komisáriu foun sira no hamutuk ita lori Funsaun Públika ida ho mellor.
Prezidente KFP terseiru mandatu apresia iha sinál di’ak tanba iha pose maioria membru governu partisipa.
“Prosesu tranzisaun ida nebe mak lao makas, ne’ebé mak la’o di’ak no sinal di’ak, tanba maioria membru governu sira partisipa iha pose ida ne’e sirkustansia di’ak, tanba KFP atu ba oin resiza iha apoiu husi Governu, situasaun ida ne’ebé terseiru mandatu ladún senti, tanba iha sirkustansia hirak ida mai husi VIII Governu tanba iha Covid-19, mudansa governamental, mudansa polítika, ne’ebé mak terseiru mandatu sente ladún iha apoiu, maibé iha IX governu konstitusional Ami sente oituan. Nune’e, ami kontinua tau aas profesionalizmu, tane aas meritukrasia, atu oinsá asegura di’ak liutan responsabilidade, asegura dezenvolvimentu kareira ne’ebé serteza, mezmu hasoru difikuldade maibé la’o, atu iha funsaun públiku ida imparsial, netral, profisional, tau aas liu kualidade no asegura integridade terseiru mandatu halo,”
dehan Prezidente KFP III Mandatu.
Agora membru KFP mai atu halo anti teze ida atu hatan ba polítika, vizaun, prioridade Governu ninian ne’ebé mak Primeiru Ministru destaka di’ak liu kona-ba funsaun públika ida netral, imparsial, profisional, auzente husi intereses grupus partidarius, tane aas liu meritukrasia, ho ida ne’e husu nafatin atu kria komunikasaun ida saudavél no koordenasaun di’ak, no husu estutura Sekretariadu, asesor sira atu suporta mandatu ne’e hodi lori KFP ba oin, dehan Faustino Cardoso Gomes.
Iha tempu hanesan Prezidente KFP, Agostinho Letêncio de Deus agradese ba serimónia pose ne’ebé prepara di’ak tebes ba Sekretária Ezekutiva, Prezidente no Komisárius sesante no funsionáriu hotu.
”Ha’u nia ideia sira ne’ebé mak hato’o iha pose la’ós buat foun maibé ideia hirak ne’e mai husi Funsaun Públika hahú husi primeiru mandatu to’o terseiru mandatu nian ha’u aprende barak husi komisáriu sira. Ha’u mai KFP la’ós foun maibé mai hanesan promosaun no aprende barak husi sensate sira durante ha’u nia jornada kareira hanesan funsionáriu públiku,”
hateten Prezidente KFP, Agostinho Letêncio de Deus.
Funsaun Públika baze ba imparsialidade, ita nafatin kaer ba imparsialidade, se la iha mak ita sei nakdoko, no ita sei haree ba interese instituisaun no públiku. Sempre husu atu presta ho kualidade servisu, hahú husi administrasaun jeral to’o Sekreáriu Ezekutivu, ita boot sira nia servisu mak sei lori Funsaun Públika ba oin, Komisárius sira hasai desizaun no téknika sira mak interpreta hodi implementa. Wainhira komisáriu sira forte mak ema téknika sira mós forte, no garante imparsialidade, dehan nia.
Primeiru Ministru ninia mensajen mós klaru katak, Funsaun Públika la’ós fatin atu buka servisu maibé fatin atu atende públiku, se buka servisu entaun ita mai de’it to’o fulan simu saláriu fila ona, maibé fatin atu halo atendimentu ba komunidade iha públiku mai atu servisu, katak, ita tenke mai ho rekezitus mak presta servisu ida ho kualidade, ho méritu, salienta Prezidente KFP, Agostinho Letêncio.
Iha administrasaun públika la’ós mai atu muda maibé atu kontinua dezenvolve baze ne’ebé iha atu kontinua dezenvolve no halo melloramentu, dehan nia.
Iha serimónia termu entrega ne’e Prezidente sensante entrega relatóriu mandatu III nian ba Prezidente Foun KFP no entrega mós sertifikadu apresiasaun ba Prezidente no Komisárius sesante sira.
Iha sesaun ne’e Sekretária Ezekutiva no Diretores sira entrega mós lembransa ba sesante sira, no entrega sertifikadu simbólikamente ba funsionáriu sira husi terseiru mandatu nian.
