Tersa-feira 28-05-2019 – Presidente KFP Interinu, Komisariu asuntu Formasaun, SIGAP no Forsa Traballu, José Telo Soares Cristovão akompaña husi Diretora Nasional Forsa Traballu, Anita de Jesus Tavares Ribeiro hamutuk Sekretariu Estadu asuntu Veteranus, Gil da Costa (Oan Soru) halo abertura teste eletronika dahuluk ba kandidatu kargu diresaun no xefia iha edifisiu Casa Europa, Dili.
Sekretariu Estadu Veteranus Libertasaun Nasional, Gil da Costa (Oan Soru)iha abertura teste eletronika, nia enkoraza kandidatu ida-idak atu hatudu kapasidade iha teste selesaun pur méritu ho sistema eletronika. Teste eletronika ne’e normalmente sempre manan no lakon, maibé kandidatu sira labele lakon vontade ho aten brani konsentrasaun durante prosesu teste, tuir prosesu legal ne’ebé Komisaun estabelese.
Sekretariu Estadu Veteranus espera katak rezultadu teste sistema eletronika ne’e sei lori ema ne’ebé ho kualidade atu servisu iha Sekretariu Estadu Veteranos Libertasaun Nasional hodi halo atendimentu ba ema oan kiak no feto faluk konsikuensia husi funu libertasaun nasional durante tinan 24 nian ne’ebé balun sidauk hatene nia paradeiru.
Sekretariu Estadu Veteranus Libertasaun Nasional, Klaran Prezidente Interinu KFP no Diretora Anita Tavares
Diretora Forsa Traballu, Anita de Jesus Tavares Ribeiro hateten, teste sistema eletronika hahu ho diseminasaun informasaun kona-ba lalaok prova esckita teste eletronika ba kandidatu sira ho durasaun oras rua nia laran.
Kandidatu nain 26 maka hatama dokumentus, maibé kandidatu nain 22 maka prezensa hodi kompete iha teste eletronika kompostu feto nain 4 no mane 18 mak kompete kargu Diretor Jeral, Diretor Nasional no Xefe departamentu.