Manufahi – 24/02/2025 – Komisaun Funsaun Públika lidera ekipa integradu kompostu, Inspesaun Jeral Estadu, Ministériu Administrasaun Estatal, Sekretariu Estadu Igualdade, Ministeriu Finansas, Institutu Nasional Seguransa Sosial, KRAM, Ministeriu Negosiu Estranejeiros no Kooperasaun no Centro Nacional Chega, hala’o aktividade diseminasaun dala uluk tinan 2025 kona-ba leis, dekretus lei no prosedimentus sira hodi asegura profesionalizmu funsaun públika ne’ebé efisiensia no efikasia ba funsionariu sira iha Munisipiu Manufahi.
Komisáriu KFP ba asuntu Disipinar, Agapito da Conceição iha abertura diseminasaun ne’e hateten, ekipa integradu disemina kona-ba lei dekretu lei no regulamentus, diliberasaun sira ba funsionariu munisipiu Manufahi impotante. Tamba ne’e husu partisipa maximu hodi bele hasa’e koñesimentu kona-ba konteudu lei sira atu bele hala’o servisu di’ak liután tuir regras no prosedimentu tuir ida-idak nia knár ba implementasaun planu dezenvolvimentu ne’ebé hala’o iha Munisipiu Manufahi. Importansia husi aktividade diseminasaun ekipa integradu atu hasa’e koñesimentu funsionariu sira ne’ebé partisipa hodi kontinua transforma ba funsionariu sira seluk iha liñas ministeriais kona-ba oinsá atu dezenvolve di’ak liu tan.
Komisáriu KFP ne’e hateten, setór importante sira hanesan Agrikultura, Edukasaun, Saúde, Obras Públika inklui setor importante sira seluk hodi fó benefisiu ba komunidade Munisipiu Manufahi.
Prezidenti Autoridade Munisipiu Manufahi, Luis Marcal da Costa Tavares maka halo abertura ba aktividade diseminasaun ne’e no iha diskursu subliña katak, liu husi diseminasaun ekipa integradu atu kontinua fahe informasaun kona-ba lei no dekretu sira hodi haklean koñesimentu servidor estadu sira atu ida-idak hatene knár no responsabilidade, inklui oinsá halo koordenasaun, konektividade servisu no senti katak, servisu hamutuk importante atu atinji objetivu dezenvolvimentu tuir lei no prosediemtu sira ne’ebé vigora iha Timor Leste.
Autoridade Manufahi husu ba partisipaantes sira atu partisipa maximu iha diseminasaun ne’e hahú to’o remata.
Aktividade diseminasaun ba loron dahuluk segunda feira ne’e, (24/02/2025), orador mai Ministeriu Administrasaun Estatal no Komisaun Funsaun Públika hodi partilla materia kona-ba Dekretu Lei nu.84/2023 Desentralizasaun Administrativa, Deveres no Direitu iha Administrasaun Públika, rejimi kargu diresaun no xefia, no kuadro pesoal.
Aktividade diseminasaun hala’o iha salaun enkontru Munisipal Manufahi konta ho partisipasaun funsionariu hamutuk nain 98 kompostu feto nain 31 no mane nain 67 mai husi liñas Ministerias sira iha munisipiu Manufahi hahú to’o remata.
Tuir observasaun iha partisipasaun maximu funsionariu sira iha sesaun husu no hatan perguntas husi orador sira.