Prezidente Komisaun Funsaun Públika, Faustino Cardoso Gomes iha sexta- feira (29/04) marka prezensa iha serimónia solene tomada de posse ba dekanu foun Fakuldade Agrikultura UNTL Prof. Doutor Vicente de Paulo Correia troka dekanu sesante Doutor Eng. Carlito de Araujo Mali Code, PhD.
Iha serimónia tomada de posse ne’e liu husi diskursu Reitor UNTL, João Soares Martins MPH, PhD fó parabéns ba dekanu foun no agradese wain ba nia ho estrutura tomak.
Ohin ba oin servi fakuldade Agrikultura durante tinan haat (4) forma engeñeru sira iha área Agrikultura no mellora Timor nia agrikultor tuir modernu nia duke agrikultor tradisional iha foho ne’ebá ho ida ne’e ezije ba fakuldade ne’e nia estudante sira atu krese, hatudu sira ninia servisu iha pratika no hasae produsaun ho rezultadu maximu, hodi bele servi Nasaun no sai independente agrikultores sira sustenta hahán nia família no komunidade sira ein jeral.
Iha parte seluk, Reitor UNTL ne’e louva lider CPD-RDTL, Ivo foti nia hanesan ezemplar tanba nia motiva ema ba servisu sein saláriu maibé, hanesan kooperativa de’it, ema balun la gosta nia, maibé, nia hatudu ho prátika ho rezultadu abundantes, sekarik ba Timor nia agrikultores hot-hotu banati tuir Ivo nia ezemplu ne’e Timor bele mós la importa foos husi rai Vietname ka rai selu-seluk.
Emposadu Prof. Doutor Vicente de Paulo Correia iha nia intervensaun ba dala uluk agradese ba Dekanu sesante ne’ebé durante nia mandatu tinan haat nia halo servisu lubuk ida iha Fakuldade Agrikultura klaru, buat balun halo di’ak no balun halo ladun di’ak maibé, nia nu’udar dekanu foun iha esperansa atu kontinua dekanu sesante nia servisu ne’e ba oin, se buat nebe ladun di’ak, hamutuk hodi hadia sai di’ak foti Fakuldade Agricultura ne’e.
Prezidente Konsellu Jeral ho reprezentasaun Madre Guilhermina Marçal iha nia diskursu hateten, UNTL marka tan istória, tanba UNTL nia oan ida asume tan kargu dekamu maibé, husu emposadu atu koopera nafatin ho Reitor, maluk dekanus, dosentes inklui funsionáriu sira hotu ne’ebé iha responsabilidade atu fó apoiu ba dekanu foun hodi la’o ba oin foti fakuldade Agrikultura ne’ebé ho sentífika, halo inovasaun no lori agrikultores sira ba agrikultores modernu. Husu mós ba dekanu sesante atu kontribui natafin hodi bele fó kualidade servisu ne’e mak vizaun misaun UNTL ninian tuba metin nafatin la’o ba oin.
Serimónia posse ne’e realiza iha auditóriu UNTL, Liceu.
