Prezidente Komisaun Funsaun Públika, Faustino Cardoso Gomes partisipa iha serimónia graduasaun UNTL ba dala XXVI ba finalistas kursu sira bacharelatu no lisensiatura hamutuk nain 627, ho tema jeral “Reconfigurar O Ensino Superior Para O Desevolvimento Participativo E Sustentável”.
Iha graduasaun ne’e iha orador sapiensia nain rua, mak Prof. DR. Rosalino Gomes, ho tópiku a cultura organizacional da organização pública no Governo Constitucional Timorense, no Prof. DR. Manuel Magno de Carvalho ko’alia kona-ba a qualidade do ensino superior implica a convergencia do curriculum nacional com quadro nacional de qualificação na parte da educação, sub tema rua ne’e mak kontribui ba tema jeral ba iha graduasaun ne’e.
Iha reitor UNTL ninia diskursu hateten, husi total graduadus ne’ebé mak iha hanesan orgullu ida ba UNTL no familia tomak no mós ba Paíz ida ne’e ho esforsu UNTL ninia ho kolaborasaun ho Governu no entidade hotu, sosiedade sivil no entidade akadémika iha rai ida ne’e. Ida ne’e hanesan faze ida ne’e mak graduadus sira konkista ona kampus akadémikus hodi konklui ona no fila hikas ba servisu komunidade no inan aman sira hodi hala’o imi nia knár iha komunidade nia leet hodi kontribui ba sosiu ekonómiku, kultural no sosial.
“Ita boot sira ne’ebé luta ba paíz ida ne’e ko’alia kona-ba importansia husi edukasaun iha sosiedade ne’e, nune’e husi eis guerrilheiro ida hateten, atu dezenvolve paíz ne’e ho di’ak jovem sira tenke estuda makás, imi labele kontente de’it ho lisensiatura maibé tenke buka aperfeisoa no investe an iha edukasaun. Ha’u fó konfiansa tomak ba ita boot sira ho ita boot sira nia aptidaun, labele hein de’it Governu maibé buka kria servisu ba an rasik, iha konsiensia ba an rasik, responsabiliza ba imi nia determinasaun ba oin”, hateten Reitor UNTL Jõao Martins Soares iha serimónia graduasaun ba dala 26 iha CCD, Merkadu Lama.
Iha tempu hanesan Ministru MESSK iha ninia diskursu felisita no fó parabéns ba estudante graduadus sira hotu ne’ebé ho sira nia empeñu no dedikasaun makás hodi konklui etapa formasaun hodi prepara an didiak hodi kompete iha merkadu traballu. Nu’udar jovemtude potensial sira mak forsa ba futuru dezenvolvimentu Timor nian presiza investe ho firmeza iha área edukasaun, iha kualifikasaun konsensional, no kursu sira ne’ebé bele fó servisu ba ema ka kursu empregabilidade.
Tuir estudu demografiku ne’ebé mak iha populasaun barak liu husi jovem sira, ita iha razaun atu optimista ba iha futuru, sira mak rikeza potensial paíz ida ne’e nian ba prósperiedade futuru.
“Importante ba ensinu superior sira hodi haree ba situasaun sira ba iha sensibilidade ba kursu ne’ebé mak fasilita sira tama iha merkadu traballu nian, ba tendensia mundial ba área formasaun hirak ne’ebé mak tenke fó valor ás liu ba ohin no ba tempu oin mai. No husu ba instituisaun superior sira fó katriz ka instituisaun sira nia kompetensia sira ne’ebé permite graduadus sira hodi integra iha merkadu traballu ida hodi bele kbiit no iha koñesimentu, hasa’e abilidade ba iha perkursu kareira nian,” hateten Ministru MESSK.
Ministru mós salienta, aspetu ida ne’e wainhira gradua ona bele ona iha kapasidade no abilidade hodi sai rekursu ida di’ak hodi kontribui, se ita la uza mak buat ne’ebé ita hetan naben de’it.
“MESSK mós implementa ona progama pilotu ida ba mellor graduadu sira hodi estajiu iha instituisaun sira, programa ne’e sai hanesan embrio iha futuru, atu nune’e universidade sira hametin mekanizmu sira hodi bele asegura empregabilidade ba sira nia graduadu sira, prinsipalmente ba graduadus sira ne’ebé hetan ona siensia teoria no prátika, konsiensia no asaun hodi bele garante prósperidade ba futuru nasaun nian,” haklean Ministro Ensinu Superior Arte no Kultura, Longuinho dos Santos.
Tuir dadus finalistas graduadus hamutuk 627, kompostu husi fakuldade Edukasaun Artes no Humanidades 250, Fakuldade Siensia Sosiais 92, Fakuldade Engeneria Siensia no Teknolojia 90, Fakuldade Siensia Saúde 74, Fakuldade Agrikultura 57, Fakuldade Ekonomia no Jestaun 34, Fakuldade Filozofia no Siensias Humanas 22.
