KFP Partisipa Loron Nasional Feto TL

Prezidente Komisaun Funsaun Públika, Faustino Cardoso Gomes partisipa iha komemorasaun loron nasionál Feto Timor-Leste ba dala 46, ne’ebé organiza husi Sekretariu Estadu Igualdade no Inkluzaun iha loron kinta feira, (03 Novembru 2022), ho tema jeral Feto Prontu Lidera.

Komemorasaun ne’e hahú ho misa agradesimentu iha Motael, hafoin misa kontinua ba kari ainfunan iha portu Díli no monumentu 7 Dezembru 1975, hodi fó omejanen ba eroina sira ne’ebé mate iha tempu invazaun Indonézia nian hanesan eroina Maria Tapó, eroina Prezidente Nicolao dos Reis Lobato nia kaben Isabel Barreto no eroina sira seluk ne’ebé mak fó an mate iha tempu rezistensia.

Sesaun ba abertura nian, Prezidente parlamentu Nasionál, Aniceto Longuinhos Guterres Lopes hateten, feto iha kapasidade, abilidade atu foti desizaun.

Feto la’ós foin mak lidera maibé desde tempu rezisténsia feto hamutuk ho mane maluk sira luta ba ukun rasin aan. Mezmu hetan torturasaun, abuzu seksual maibé feto prontu nafatin hala’o ninia papel iha tempu ukun aan nian, iha tempu agora feto kontinua kontirbui ba ukun aan nian hodi liberta povu, mezmu hatudu númeru feto sei iha númeru kiik maibé nafatin luta, tanba feto mak sai hanesan parseiru ba dezenvolvimentu iha uma laran, tantu ekonomia, sosial, edukasaun no polítika hodi bele kontribui ba prosesu tomak Estadu nain, hateten  vise Primeira Ministra no Ministra MSSI, Armanda Berta iha ninia diskursu abertura.

Iha tempu hanesan reprezentante feto rezisténsia Idelta Rodrigues hateten, lian feto sai hanesan motor dezenvolvimentu iha edukasaun no sosial hodi harii no kontribui ba luta dezenvolvimentu rai doben Timor-Leste.

Entretantu, Sekretariu Estadu Igualdade no Inkluzaun iha ninia diskursu hateten, loron importante ne’e atu relembra no rekoñese hodi fó omenajen ba feto sira iha luta ukun rasik aan, liu-liu ba saudoza Maria Tapó no eroina sira seluk, atu ita hatutan sira nia misaun ne’ebé mak husik hela mai ita, ho ida ne’e mak ho tema prinsipal ba tinan ne’e FETO PRONTU ATU LIDERA.

Partisipa iha komemorasaun ne’e Prezidente Parlamentu Nasional, Membru VIII Governu Konstitusional, Prezidente GMPTL, reprezentante embaixada Australia, ajénsia nasional no internasional, Rede Feto, parseirus dezenvolvimentu sira no komunidade sira.