21 Outubru 2021, Teste Promosaun jeral ba funsionáriu públiku sira ne’ebé mak realiza iha Komisaun Funsaun Públika hetan vizita husi Komisaun E-Parlamentu Nasional, asuntu infraestrutura, transporte no komunikasaun hodi hare direta prosesu promosaun uza sistema eletrónika TCExam nune’e mós ekipa téknika hala’o aprezentasaun sistema digitalizasaun 42 KFP nian ne’ebé mak eziste no uza iha KFP.
Iha vizita ne’e Prezidente Komisaun E-PN apresia tebes ba servisus KFP, ba promosaun ne’ebé realiza ho transparante, efisiensia, efikasia, lais liu tan no garante kualidade iha administrasaun públika timorense.
“Sistema foun teste atu hasa’e grau ba ita nia funsionáriu sira, ami impresionadu tebes, wainhira tama mai sala teste ami hare sistema ne’e, efetivu, lais no transparante tebes. Ami apresia tebes ba KFP no ekipa tomak, hau fiar katak, ida ne’e bele sai modelu ba instituisaun sira seluk, ami apresia tebes tanba bele hamosu sistema ne’e hodi bele fo teste ba funsionáriu sira iha ne’e no mós ba diplomata sira ne’ebé iha liur.
Ida ne’e difisil atu halo manipulasaun ba preparasaun mekanizmu ne’ebé mak iha, fatin ne’ebé transparante, kualidade no garante kualidade ne’ebé mak iha, sira tuir teste no sai husi fatin ne’e bele hare kedas sira nia rezultadu teste ne’ebé mak iha, sistema ne’e di’ak tebes, ami apresia KFP,” hateten, Prezidente Komisaun E-Parlamentu Nasional, deputadu Abel Pires iha salaun Aikurus Binani-KFP, iha Matadouro Dili.
Durante vizita komisaun E PN nian mai KFP iha promosaun teste eletrókika ne’e hetan akompañamentu husi Prezidente KFP no Komisáriu sira nune’e mós ekipa tékniku sira.
