Bispu Eleitu Dom Leandro Maria Alves oficialmente ordena sai Bispu ba Diocese Baucau iha loron 21 Fulan Jullu 2023 iha Katedral Baucau.
Dom Leandro Maria Alves ordenadu hanesan Bispu, wainhira Bispu Renate Prinsipal Dom Virgílio Cardinal do Carmo da Silva kose mina Santa ba Bispu Eleitu nia ulun, tau kadeli ba liman no entrega Patente ba Bispu Foun hodi konvida ba tur kedas iha fatin Santu Diocese Baucau nian, hodi substitui Dom Basilio do Nascimento ne’ebé Aman Maromak bolu ona iha tinan hirak liu ba kotuk.
Iha Serimónia principal ne’e Bispu Renate hodi Espíritu Santu nia kbit tulan liman hodi dehan, Maromak be halo ona Ó hola parte iha Nai Lulik Boot Kristu Nian, naksulin iha Ó Leten tinan moris futar ksolok nian, tun duni iha Ó nia-an, kmanek bensaun nian, Simu Evanjellu ba, no haklaken Maromak nia futar lia fuan.
Hafoin serimonia ordenasaun, Bispu Foun Dom Leandro Maria Alves hadame malu ho inan aman, Autoridade Nasaun nian no sarani sira, kontinua fó bensaun diretamrente ba Sarani tomak husi Katedral nia oin, to’o iha eskola misaun Wailia, tun fali ba Katedral ho akompaña husi Bispu Diocese Dili ho Maliana.
Iha Diskursu, Bispu Diocese Baucau ne’e hateten, loron matan nakbo’as ona, raihun mutin hahú ona iha Loro-Sae nia oin, naroman mai ona, nakukun ses tiha, mai ita hotu simu ida be mai hodi Nai Nia Naran, Dom Leandro Maria Alves hato’o lia hirak ne’e hafoin nia Ordenasaun iha Igreja Katedral Baucau Sexta-feira foin lalais ne’e.
Iha momentu ne’e Dom Leandro sente ksolok no gratidaun ba maluk sira hotu ne’ebé halibur iha Igreja Katedral Baucau nia oin, tamba ita boot sira hotu nia prezensa, hodi sente ksolok Maromak nian hamutuk ho ita boot sira iha Diocese Baucau.
Bispu Baucau ne’e kompromete katak hodi Maromak nia tulun ho imi hotu nia harohan daet, sei motiva nia hodi hakaas-an atu halo duni knar Bispu nian ne’e, tuir buat ne’ebé sarani sira hein husi Bispu ida ne’ebe, nu’udar Bibi atan be Maromak saran ona Nia povo ba nia liman.
Enkuantu Bispu Diocese Maliana Dom Norberto do Amaral hateten, Ohin Igreja Universal Timor-Leste liu-liu Diocese Baucau, Soi duni ba grasa boot Na’i Maromak nian ne’e, Dom Leandro Maria Alves, ne’ebe sarani Baucau hein kleur ona, ohin hetan ona husi ordenasaun no hot-hotu hare no sai sasin ba lalaok ohin nian, no ba imi Baucau oan sira Nai Maromak hahú ona ho grasa boot ba imi hotu.
Tuir Bispu Maliana, iha momentu espesial ne’e Dom Basílio do Nascimento haksolok hamutuk ho ita iha fatin ida ne’e, no ho Serimónia espesial ida ne’e, konsidera Dom Leandro Maria Alves nudar kafé musan ida rai Ermera nian, ne’ebé monu iha rai Baucau Fatuk laran, hodi transforma ba kulu gisa, husi kulu fuan no nia tahan, hamahan rai Baucau.
Iha momentu ne’e, reprezentante de Santa Sé Papa Francisco iha Timor Leste Monsenhor Marco Sprizzi konsidera Selebrasaun Ordenasaun Bispu Dom Leandro Maria Alves nu’udar Segundu Bispu Diocese Baucau nian, hanesan reprezenta Santa Sé nian ne’ebe nakonu ho Bensaun no felisitasaun Santo Padre Francisco nian, hodi konduz Nunsiatura Apostólika sai Pastor foun no diak iha rai doben Diocese Baucau.
Ho momentu historiku ne’e, fo hanoin fali Prezidente da Repúblika José Ramos Horta hodi hateten, Igreja Katólika maka kontribui iha tinan atus ba atus, ba formasaun Timor-Leste nia istória, Relijiaun, identidade kultural, idetidade Timor-Leste nian, iha fatin fatin no iha Mundu.
Ikus liu Komisá Fausto Freitas da Silva, sente kontente tebes, tanba iha 1996 Bispo Primeiru Dom Basílio mai iha Baucau iha momentu ne’ebe ho situasaun manas iha Timor-Leste, jovem barak lakon, no ohin loron sente diak, tanba Serimónia lao ho susesu no diak ho prezensa Bispu, Kardinal no reprezenta Santa Sé iha Timor-Leste.
Partisipa iha Misa de Ordenasaun Bispu Eleitu Baucau, Prezidente da Repúblika, Prezidente parlamentu, Reprezentante Primeniru Ministru no Membrus du Governu sira, Komisarius KFP, Bispu de Atambua Indonesia, Bispu Darwin Austrália, Relijiozus no Relijiozas husi Timor tomak, inklui Parokianus no Povu Sarani tomak.