Prezidente no Komisárius Komisaun Funsaun Públika akompaña husi Sekretaria Ezekutiva, Inspetora, diretores no xefes departamentu sira partisipa reuniaun Komite Revizaun Orsamentu (KRO) tinan 2025 iha salaun Kayrala Xanana Gusmão, Ministériu Finansas, Aitarak Laran, Díli iha kinta-feira, 22/8/2024.
Prezidente Komisaun Funsaun Públika iha enkontru aprezenta kona-ba planu orsamentu KFP ba tinan 2025 hamutuk dolar Amerikanu $ 2,623,630.00, fahe ba kategoria salárius vensimentus $ 1,842,798.00 (70%), bens e serviços $ 780,591 (30%). Nune’e KFP ninia orsamentu ba tinan 2024 ho total 3,048,399.00 koloka ba saláriu vensimentu $ 2,127,049.00 (69.9%), bens servisus $ 918,350.00 no tranferensias públikas $ 3,000.00 (30.1% dolar Amerika).
Prezidente KFP, Agostinho Letêncio de Deus aprezenta mós pedidu orsamentu adisional ho montante dolar Amerikanu $ 2,280,000.00 kategoria ba saláriu vensimentu dolar Amerikanu $ 150,000.00, selu asesor nasional no kargu xefias no bens servisus ho kustu dolar Amerikanu $ 1,670,000.00, ne’ebé aloka ba dezenvolvimentu konseitu peskiza ho montante $ 250,000.00 no finansia ba dezenvolvimentu digitalizasaun interfase kapasitasaun no preparasaun rekursu umanus iha adezaun ba ASEAN pilar ASCC no pilar foun “institutional strenghening” dolar Amerikanu $ 150,000.00. Aloka osan dolar Amerikanu $ 600,000.00 no $ 650,000.00 ba formasaun karater building no disiplina ba funsionariu foun nain 250 iha Metinaru liu husi kooperasaun ho F-FDTL.
Alende ne’e iha tinan 2025 KFP sei hamosu sentru atendimentu iha nivel regional hanesan Baucau hodi halo atendimentu ba funsionáriu sira iha Munisípiu Lautem no Viqueque. Sentru atendimentu Manufahi kobre Munisípiu Covalima no Ainaro, sentru atendimentu iha Bobonaro no RAEOA, no sentru atendementu Dili kobre de’it ba Manatuto, Likisa, Aileu no Ermera. Inklui planu kontinua kontrata asesor sira, tanba ne’e kontrata asesor junior atu haree ba despaisu sira.
Agostinho Letêncio de Deus subliña, programa apezentasaun orsamentu KFP ba 2025 tuir plafon orsamentu ne’ebé simu no aprezentasaun planu orsamentu adisional desizaun tomak iha Komite Revizaun Orsamentu hafoin hato’o hikas ba KFP. Orsamentu ne’ebé KFP propoin atu kompleta prioridade prinsipal liga ho planu reforma Administrasaun Públika, prosesu konseitu ba estudus tamañu forsa traballu, rekrutamentu, avaliasaun dezempeñu, polítika kapasitasaun rekursus umanus.
Enkuantu orsamentu adisional ba digitalizasaun, formasaun karakter building servisu hamutuk ho F-FDTL, planu seluk mak reuniaun regular entre dirigentes Administrasaun Públika ho Primeiru-Ministru ho objetivu atu haree ba iha reajustamentu planu sira, ideia hanesan, konseitu hanesan no servisu koordenasaun servisu interministerial sira atu bele koalia ba malu asuntu sira interligadu sira.
Propoin mós kapital menor sosa mobiliariu ba edifisiu foun E-recruitment hanesan komputador sira, meza no kadeira sira hodi prense ba edifisiu no kompra viatura haat ne’ebé iha kuaze mai husi primeiru mandatu too agora atu asegura servisu Komisaun ho efetivu liután.
Entretantu liga ba ezekusaun orsamentu KFP nian ba 2024, Prezidente KFP esplika, ezekusaun orsamentu 2024 KFP nian to’o meiadu fulan Agostu atinji ona pursentu 52%, no ba ezekusaun seluk to’o fulan Dezembro 2024 sei atinji 88 pursentu.
Reuniaun KRO ne’e konta ho partisipasaun husi Prokuradoria Jeral Repúblika (PGR), Provedoria Direitos Humanos e Justiça (PDHJ), Komisaun Anti Korupsaun (KAK), Komisaun Funsaun Públika (KFP), Konsellu Imprensa no Komisaun Nasional Eleisoens (CNE), ne’ebé dirije husi Primeiru Ministru, Kay Rala Xanana Gusmão, vise primeiru ministru nain rua no membru Komisaun Revizaun Orsamentu (KRO) inklui observador husi organizasaun ema ho defisiensia, SEI no INDICA.
